វត្ថុធាតុទាំង ១៦ ដែលមានតម្លៃថ្លៃជាងគេបំផុតនៅលើលោក! មិនមែន «មាស» ទេ!
Connect with us

គួរដឹង

វត្ថុធាតុទាំង ១៦ ដែលមានតម្លៃថ្លៃជាងគេបំផុតនៅលើលោក! មិនមែន «មាស» ទេ!

អស់រយៈពេលជាច្រើនសតវត្សមកហើយមនុស្សជាច្រើនជឿថាមាសគឺជាវត្ថុធាតុដើមថ្លៃបំផុតនៅក្នុងពិភពលោក។ ប៉ុន្តែជាក់ស្តែងទៅ មាសមិនមែនជារបស់ដែលមានតម្លៃថ្លៃដាច់គេនោះទេគ្រាន់តែមនុស្សមួយចំនួនមិនបានដឹងអំពីវា។

យើងខ្ញុំបានធ្វើការចងក្រងបញ្ជីសម្ភារៈដែលមានតម្លៃខ្ពស់បំផុតនៅក្នុងពិភពលោកដូចខាងក្រោម៖

១. Antimatter – ៦២.៥ ពាន់លានដុល្លារ ក្នុង ១ក្រាម

Antimatter ជាវត្ថុដែលថ្លៃជាងគេបង្អស់លើផែនដី។ ដើម្បីផលិតបាន Antimatter ១ មីលីក្រាម គេត្រូវចំណាយជាង ២៥ លានដុល្លារ។ បើតាមទ្រឹស្តី គេអាចយកវាទៅធ្វើឥន្ធនៈសម្រាប់យានអវកាសនៅពេលអនាគត ប៉ុន្តែអ្វីដែលជាបញ្ហាសម្រាប់ផលិតវានោះគឺ មិនមែនត្រឹមតែតម្លៃនោះទេ គឺពេលវេលានៃការផលិតទៀតផង។

២. Californium – ២៥-២៧ មីលានដុល្លារ ក្នុង​ ១ក្រាម

Californium ជាប្រភេទសារធាតុគីមីដែលថ្លៃជាងគេបង្អស់លើលោក។ ចាប់តាំងពីត្រូវបានគេរកឃើញ ក្នុងឆ្នាំ ១៩៥០ មក វាត្រូវបានគេបង្កើតតែម្តងប៉ុណ្ណោះ ដោយសារតែតម្លៃដ៏ថ្លៃរបស់វា។

៣. Diamond – ៥៥ ០០០ ដុល្លារ ក្នុង ១ក្រាម

មិនចាំបាច់រ៉ាយរ៉ាប់ច្រើននោះទេ វាគឺជាវត្ថុដែលមានតម្លៃ ដែលគេយកមកធ្វើជាគ្រឿងអលង្ការដ៏ស្រស់ស្អាត ដែលនារីគ្រប់ៗរូបសុទ្ធតែប្រាថ្នាចង់បាន។

៤. Tritium – ៣០ ០០០ ដុល្លារ ក្នុង ១ក្រាម

ឧស្ម័ននេះត្រូវបានគេប្រើប្រាស់ដើម្បីបង្កើតនូវពន្លឺដ៏ស្រស់ស្អាត។ ដើម្បីផលិតបានឧស្ម័ន Tritium ១ ផោន គេត្រូវចំណាយប្រហែលជាង ១៥ លានដុល្លារ។

៥. Taaffeite – ២០ ០០០ ដុល្លារ ក្នុង ១ក្រាម ឬ ៤០០០ ដុល្លារ ក្នុង ១ការ៉ាត់

ជាដុំរ៉ែដ៏មានតម្លៃ និងមានច្រើនពណ៌ដូចជាពណ៌ស្វាយ ផ្កាឈូក ក្រហម ឬ ស។ វាសឹងតែជារ៉ែកម្រជាងរ៉ែត្បូងរាប់ពាន់ដង។ ប៉ុន្តែទោះបីជាវាកម្រយ៉ាងណាក៏ដោយ វាមិនសូវជាត្រូវបានគេពេញនិយមយកមកធ្វើជាគ្រឿងអលង្ការ ដែលជាហេតុផលធ្វើ​ឱ្យវាមានតម្លៃថោកជាងប្រើប្រៀបនឹងពេជ្រ។

៦. Painite – ៩០០០ ដុល្លារ ក្នុង ១ក្រាម

វាជាដុំរ៉ែដ៏មានតម្លៃ ហើយកម្រដែលសឹងតែគ្មានអ្នកណាម្នាក់ស្គាល់នោះទេ។ វាជាពពួករ៉ែដែលមានពណ៌ទឹកក្រូច ឬ ត្នោតក្រម៉ៅ ហើយវាទើបត្រូវបានគេរកឃើញកាលពី ៦៥ ឆ្នាំមុនប៉ុណ្ណោះ។ រហូតមកដល់បច្ចុប្បន្ននេះ ដុំរ៉ែនេះមានតិចតួចមែនទេែនដែលគេប្រទះឃើញ។

៧. Plutonium – ៤០០០ ដុល្លារ ក្នុង ១ក្រាម

ជាសារធាតុវិទ្យុសកម្មដែលមានទម្ងន់ និងម៉ាស់ធ្ងន់ខ្លាំង ប៉ុន្តែមានលក្ខណៈផុយស្រួយខ្លាំង។ វាត្រូវបានគេប្រើប្រាស់ដើម្បីចម្រាញ់ជាថាមពលសម្រាប់ប្រើប្រាស់ក្នុងអាវុធនុយក្លេអ៊ែ និងជាប្រភពថាមពលសម្រាប់យានអវកាសផងដែរ។

៨. LSD – ៣០០០ ដុល្លារ ក្នុង ១ក្រាម

ជាប្រភេទថ្នាំរវើរវាយមួយប្រភេទដែលមានអនុភាពខ្លាំងសម្បើម អាចធ្វើឱ្យអ្នកប្រើប្រាស់ស្រមើស្រមៃដ៏ពិភពដ៏ចម្លែក។ វាមានតម្លៃថ្លៃខ្លាំង ដោយសារការផលិតរបស់វាមានការលំបាក និងមានភាពស្មុគស្មាញខ្លាំង។

៩. Cocaine – ២៣៦ ដុល្លារ ក្នុង ១ ក្រាម

កូកាអ៊ីនជាគ្រឿងញៀនមួយប្រភេទដែលមានតម្លៃកប់ពពក ប៉ុន្តែមិនមាននាំមកអ្វីផ្សេងក្រៅពីផលប៉ះពាល់សុខភាព និងទោសទណ្ឌតាមផ្លូវច្បាប់នោះទេ។

១០. Heroin – ១៣០ ដុល្លារ ក្នុង ១ក្រាម

ម្សៅអាភៀននេះអាចមានឥទ្ធិពលញៀនខ្លាំងចំពោះមនុស្ស។ វាជាសារធាតុខុសច្បាប់ ហើយបើទោះជាខុសច្បាប់ក៏ដោយ មានមនុស្សជាច្រើនចង់ប្រើប្រាស់ និងរត់ពន្ធលួចលាក់ជួញដូរផងដែរ។ ជាក់ស្តែង តម្លៃដ៏ថ្លៃរបស់វា គឺដោយសារតែការហាត់ឃាត់តឹងតែងមិនឱ្យប្រើប្រាស់នេះឯង។

១១. Rhinoceros’s horn – ១១០ ដុល្លារ ក្នុង ១ក្រាម

ដោយសារមានជំនឿថា ស្នែងរមាសមានភាពសក្តិសិទ្ធិក្នុងការព្យាបាលជម្ងឺដង្កាត់ផ្សេងៗជាច្រើនមុន និងអាចយកមកធ្វើជាយន្តការពារខ្លួនទៅតាមអបិយជំនឿអូមអាមផងនោះ រមាសជាច្រើនរយក្បាលត្រូវបានឈ្មូញ និងព្រានព្រៃសម្លាប់យ៉ាងឃោរឃៅដើម្បីយកស្នែងមកជួញដូរ។

១២. Methamphetamine  – ១០០ ដុល្លារ ក្នុង ១ក្រាម

បើទោះជាចាត់ទុកជាសារធាតុខុសច្បាប់ក៏ដោយ មេតំហ្វេតាមីនជាសារធាតុដែលមានតម្លៃថ្លៃកប់ពពក។ ប៉ុន្តែកុំព្យាយាមចង់ប៉ះ ឬចង់សាកវាអី ដោយសារវាអាចមានផលប៉ះពាល់ធ្ងន់ធ្ងរសល់សុខភាព។

១៣. Platinum – ៦០ ដុល្លារ ក្នុង ១ ក្រាម) 

ប្រហែលគ្រប់គ្នាក៏បានស្គាល់ថាប្លាទីន ជាលោហធាតុដែលមានតម្លៃ ប៉ុន្តែប្រហែលជាអ្នកមិនបានចាប់អារម្មណ៏ថាតាមពិតទៅ ប្លាទីនមានតម្លៃថ្លៃជាងមាសទៅទៀត ដោយសារវាជាលោហធាតុកម្រ និងអាចធន់បានទៅនឹងជាតិអាស៊ីត ជាតិអាល់កាលី និងសារធាតុផ្សេងៗទៀតជាច្រើន។

១៤. Rhodium – ៥៨ ដុល្លារ ក្នុង ១ ក្រាម)

Rhodium ជាប្រភេទលោហធាតុមួយប្រភេទដ៏កម្រក្នុងក្រុមពួកប្លាទីន។ វាកម្រខ្លាំងមែនទែន ដែលក្នុងមួយតោននៃស្រទាប់ផែនដី មាន Rhodium នេះត្រឹមតែចំនួនប្រហែល ០.០០១ ក្រាមប៉ុណ្ណោះ។

១៥. Gold (មាស) – ៥៦ ដុល្លារ ក្នុង ១ ក្រាម

ជាវត្ថធាតុដែលគេគ្រប់គ្នាបានដឹង បានលឺ និងស្គាល់ថាជាវត្ថុដ៏មានតម្លៃ ដែលម្នាក់ៗសុទ្ធតែចង់បានដើម្បីយកមកលម្អ យកមកប្រើប្រាស់ជាដើម។ ជាក់ស្តែង វាត្រូវបានគេឱ្យតម្លៃយ៉ាងខ្លាំងតាំងពីអតីតកាលយូរលង់មកហើយ ដែលសឹងតែគ្មានអ្វីអាចមកកាត់ថ្លៃបានឡើយ។ ប៉ុន្តែ ទោះជាយ៉ាងនេះក៏ដោយ មាសគ្រាន់តែជាវត្ថុធាតុមួយក្នុងវត្ថុធាតុដែលថ្លៃៗដទៃទៀតប៉ុណ្ណោះ។

១៦. Saffron (១១ ដុល្លារ ក្នុង ១ ក្រាម)

ជាគ្រឿងទេសមួយប្រភេទដែលប្លែក និងមានតម្លៃខុសពីគេ ដោយសារវាមានរសជាតិឆ្ងាញ់ ហើយថែមទាំងមានប្រយោជន៏សម្រាប់សុខភាពផងដែរ ដែលមិនអាចប្រៀបបានពីសំណាក់គ្រឿងទេសដទៃទៀត។ ដំណើរការដាំ និងផលិតត្រូវចំណាយពេលយូរ និងទាមទារឱ្យមានការថែទាំយ៉ាងយកចិត្តទុកដាក់ផងដែរ។

ប្រភព៖ Bright Side

ដកស្រង់ដោយ៖ www.telldaily.com

Trending

Copyright © 2019 ANARCHAK