Circle K បើកសាខាទី21នៅអាកាសយានដ្ឋានភ្នំពេញនិងបំណងពង្រីកដល់ 300 សាខានៅកម្ពុជានិងអាកាសយានដ្ឋានសៀមរាប ទីក្រុងសីហនុ!
Connect with us

ថ្មីៗ

Circle K បើកសាខាទី21នៅអាកាសយានដ្ឋានភ្នំពេញនិងបំណងពង្រីកដល់ 300 សាខានៅកម្ពុជានិងអាកាសយានដ្ឋានសៀមរាប ទីក្រុងសីហនុ!

ក្នុងរយៈពេលត្រឹមតែជាង 2 ឆ្នាំប៉ុណ្ណោះ  Circle K បានពង្រីកខ្លួនបានជាង 20 សាខាហើយ! ហើយសាខាចុងក្រោយគេនេះដែលជាសាខាទី 21 គឺមានទីតាំងនៅក្នុងអាកាសយានដ្ឋានអន្តរជាតិភ្នំពេញផ្ទាល់ នៅបរិវេណស្ថានីយ៍អ្នកមកដល់ Arrival Terminal តែម្ដងដែលទើបតែបើកសម្ពោធជាផ្លូវការកាលពី​ព្រឹកថ្ងៃសុក្រ ទី12 ខែមេសា ឆ្នាំ 2019នេះ។

     

សាខាអាកាសយានដ្ឋានអន្តរជាតិភ្នំពេញនេះ គឺជាសាខាទី 21 ក្នុងរយៈពេលត្រឹមតែ 2 ឆ្នាំប៉ុណ្ណោះបន្ទាប់ពី Circle K ឈានជើងចូលមកដល់ប្រទេសកម្ពុជាក្នុងឆ្នាំ 2017 ហើយសាខានេះមានទីតាំងនៅបរិវេណស្ថានីយ៍អ្នកមកដល់ Arrival Terminal នៃអាកាសយានដ្ឋានអន្តរជាតិភ្នំពេញនេះដែល ដែលគេរំពឹងទុកថានឹងទទួលបានការគាំទ្រនឹងផ្ដល់ភាពងាយស្រួលដល់ភ្ញៀវដែលធ្វើដំណើរមកដល់ អ្នកចាំទទួលភ្ញៀវ និងបុគ្គលិកធ្វើការនៅក្នុងអាកាសយានដ្ឋានផងដែរ។

ការបើកសម្ពោធជិតថ្ងៃពិធីបុណ្យចូលឆ្នាំប្រពៃណីខ្មែរដូច្នេះគឺជាពេលវេលាដ៏សាកសម ដោយនៅថ្ងៃ 14-15-16 មេសា ខាងមុខនេះគឺនឹងមានសន្ទុះចរាចរណ៍ភ្ញៀវហោះហើរចេញនិងចូលស្រុកច្រើន ទាំងភ្ញៀវក្នុងស្រុកធ្វើដំណើរកំសាន្ដទៅលំហែកាយនៅប្រទេសក្រៅនិងភ្ញៀវបរទេសដែលហោះហើរមកចូលរួមពិធីបុណ្យចូលឆ្នាំខ្មែរផងដែរ។ 

នៅក្នុងការបើកសម្ពោធថ្មីនេះ  លោក Steven Yos នាយកប្រតិបត្តិនៅក្រុមហ៊ុន TH CVS Co., LTD, ដែលបាននាំចូលនិងគ្រប់គ្រង់ Circle K នៅកម្ពុជា ក៏បានចូលរួមផ្ដល់ជាកិត្តិយសនិងបកស្រាយទាក់ទងនឹងការសម្រេចបើកសាខានៅអាកាសយានដ្ឋានអន្តរជាតិភ្នំពេញនេះផងដែរ។ លោក Steven បានមានប្រសាសន៍ថា “ទីតាំងអាកាសយានដ្ឋាននេះគឺជាទីតាំងដ៏ល្អឥតខ្ចោះសំរាប់ពួកយើង។ Circle K គឺជាមិត្តសំលាញ់របស់អ្នកធ្វើដំណើរគ្រប់រូបព្រោះនៅពេលដែលអ្នកធ្វើដំណើរ អ្នកមិនមានរបស់ជាប់ខ្លួនច្រើនទេដូច្នេះពួកយើងអាចជួយអ្នកបាន មិនថាឡើយជាសេវាកម្មផ្សេងៗ នំ ចំណី ឬភេសជ្ជឡើយ”។

 

គាត់ក៏បានបន្ថែមទៀតផងដែរថា ដោយគាត់បានសង្កេតឃើញអាកាសយានដ្ឋានបរទេសភាគច្រើនដែលមានម៉ាតដល់ទៅ 3-4 ហើយសំរាប់ភ្ញៀវទេសចរណ៍ភាគច្រើន ម៉ាតនៅក្នុងអាកាសយានដ្ឋានគឺជាការដក់ជាប់ក្នុងចិត្តដំបូងបំផុតពេលឈានជើងចូលដំបូងចូលប្រទេសមួយ ដូច្នេះគាត់សង្ឃឹមថាសាខា Circle K នេះនឹងធ្វើឲភ្ញៀវទេសចរណ៍មានអារម្មណ៍ទទួលស្វាគមន៍ហាក់ដូចជានៅប្រទេសផ្ទាល់ខ្លួន ដោយCircle K គឺជាប្រ៊េនម៉ាតអន្តរជាតិដែលត្រូវបានទទួលស្គាល់និងល្បីល្បាញជុំវិញពិភពលោក។ ជាបញ្ចាប់លោក Steven ក៏បានប្រកាសពីមហិច្ឆិតានិងគោលការណ៍របស់ Circle K ដែលចង់ពង្រីកសក្ដានុពលនិងវិសាលភាពឲបានពាសពេញប្រទេសកម្ពុជារហូតដល់ 300 សាខាត្រឹមឆ្នាំ 2026 ខាងមុខនេះ រួមបញ្ចូលទាំងសាខានៅអាកាសយាសដ្ឋានសៀមរាបនិងក្រុងព្រះសីហនុផងដែរ។ 

គោលបំណងចំបងនិងចំណុចដែលធ្វើឲ Circle K ខុសពីម៉ាតទូទៅគឺការផ្ដល់នូវភាពងាយស្រួលនិងសេវាកម្មសំបូរបែបជូនភ្ញៀវ 24 ម៉ោងដែលរួមបញ្ចូលទាំង ចំណីអាហារឆ្អិនស្រាប់ ទីតាំងធំទូលាយនៅតំបន់ទីប្រជុំជន សាលា ក្រុមហ៊ុននិងទេសចរណ៍ ប្រព័ន្ធWIFI ដោយឥតគិតថ្លៃ សេវាបង់ថ្លៃទឹក ភ្លើង អ៊ិនធឺនែត ទូរស័ព្ទ ខ្សែកាបនិងការទូទាត់សេវាផ្ទាល់ខ្លួនផ្សេងៗ សេវាបញ្ចូលលុយទូរស័ព្ទ សេវាផ្ញើរឥវ៉ាន់និងដឹកជញ្ចូន សេវាធនាគារ ATMដកនិងដាក់សាច់ប្រាក់ និងកន្លែងដែលភ្ញៀវអាចអង្គុយសំរាកយ៉ាងធំទូលាយនិងមានផាសុកភាពផងដែរ។

Circle K មានដើមកំណើតមកពីសហរដ្ឋអាមេរិកដែលបើកដំបូងនៅឆ្នាំ 1951 ហើយមកទល់សព្វថ្ងៃនេះ Circle K មានសាខាជាង 16,000 ទូទាំងពិភពលោកដូចជាប្រទេសកាណាដា ហុងកុង ឌូបៃ ឥណ្ឌូណេសុី ហុងកុង ម៉ាកាវ គ័ងចូវ និងវៀតណាមជាដើម៕

មតិយោបល់

Trending

Copyright © 2017 Zox News Theme. Theme by MVP Themes, powered by WordPress.