ទាំងនេះហើយជាចរិតទាំង ៤ របស់អ្នកមាន ដែលខុសគ្នាឆ្ងាយពីអ្នកក្រ!
Connect with us

បែបផែនជីវិត

ទាំងនេះហើយជាចរិតទាំង ៤ របស់អ្នកមាន ដែលខុសគ្នាឆ្ងាយពីអ្នកក្រ!

មនុស្សយើងម្នាក់ៗកើតមក តែងតែមានវាសនាខុសគ្នា ដោយអ្នកខ្លះកើតមកមានវាសនាខ្ពស់ បានកើតចំគ្រួសារអ្នកមាន មានវង្សខ្ពង់ខ្ពស់ រស់ក្នុងគំនរមាសប្រាក់ចាយមួយជាតិក៏មិនអស់ ព្រមជាមួយនឹងជីវិតសម្បូរបែប។

រីឯអ្នកខ្លះទៀត បែរជាកើតចំគ្រួសារអ្នកក្រខ្សត់លំបាក រកអង្ករច្រកឆ្នាំងស្ទើរតែពុំបានទៅវិញ។ ដោយឡែក សម្រាប់មនុស្សមួយប្រភេទផ្សេងទៀត ដោយអាចនិយាយបានថាពួកគេក៏មានសំណាងដែរ ដែលពួកគេកើតចំគ្រួសារដែលសាមញ្ញៗ មិនមានពេក ហើយក៏មិនក្រពេក ប៉ុន្តែក៏មានសុភមង្គលអាចរស់នៅ បានដោយសប្បាយចិត្តតាមជីវិតសាមញ្ញធម្មតារបស់ពួកគេផងដែរ។

យ៉ាងណាមិញ បើក្រឡេកមកសង្គមបច្ចុប្បន្ននេះ​ យើងក៏សង្កេតឃើញថា កំពូលអ្នកមានជាច្រើននៅលើពិភពលោក ពួកគេក៏មិនមែនកើតមកយកទ្រព្យសម្បត្តិទាំងនេះមកតាមខ្លួននោះទេ ប៉ុន្តែវាកើតឡើងពីការខិតខំប្រឹងប្រែងរបស់ពួកគេ។

ដោយឡែក ងាកមកចាប់អារម្មណ៍ពី អត្តចរិតខុសគ្នា រវាងអ្នកមាន និងមនុស្សសាមញ្ញវិញម្តង ថាតើទម្លាប់នៃការរស់នៅ ក៏ដូចជារបៀបរបបនៃការគិតរបស់ពួកគេមានភាពខុសគ្នាយ៉ាងណាខ្លះទៅ បានជាធ្វើឲ្យពួកគេមានវាសនាខុសគ្នាបែបនេះ?

១). មនុស្សសាមញ្ញព្យាយាមស្វែងរកកំហុស: មនុស្សសាមញ្ញតែងតែព្យាយាមស្វែងរកបញ្ហា ច្រើនជាងការស្វែងរកដំណោះស្រាយ។ ដោយភាគច្រើនពួកគេតែងតែ ស្តីបន្ទោសទៅកាន់បរិយាកាសជុំវិញខ្លួន ឱកាសការងារ ដែលចោទថាដោយសារតែកត្តាទាំងនោះហើយ ដែលធ្វើឲ្យពួកគេមិនអាទទួលបានភាពជោគជ័យនៅក្នុងជីវិត ។

អ្នកមានតែស្វែងរកភាពជោគជ័យ: អ្នកមានយល់ច្បាស់ពីអ្វីគ្រប់យ៉ាងដែលបានកើតឡើងដោយមានហេតុនិងផល។ លើសពីនេះ ពួកគេជ្រើសរើសជីវិតស្ងប់សុខជាជាង យកខ្លួនឯងទៅធ្លាក់ចូលក្នុងបញ្ហា ដែលធ្វើឲ្យស្មុគស្មាញ និងធ្វើឲ្យពួកគេបាត់បង់ឱកាស និងខាតពេលការងារដែលពួកគេកំពុង​ធ្វើ និងអ្វីដែលពួកគេចង់បាន ។

២). មនុស្សសាមញ្ញចូលចិត្តធ្វើការសន្និដ្ឋាន: រឿងនេះជារឿងទូទៅរបស់មនុស្សសាមញ្ញ ពួកគេតែងតែធ្វើសន្និដ្ឋានរួចគិតដោយខ្លួនជានិច្ច ជាក់ស្តែងដូចជាពេលដែលអ្នកជួបនឹងមនុស្សល្បីម្នាក់ ហើយចង់ចូលទៅជិត និងនិយាយជាមួយនឹងពួកគេ ប៉ុន្តែខណៈនោះអ្នកបែរគិតក្នុងជិតថា៖«ពួកគេប្រហែលជាមិនមានពេលនិយាយជាមួយនឹងពួកយើងនោះទេ» បន្ទាប់មកអ្នកក៏សម្រេចចិត្តមិនចូលទៅនិយាយជាមួយគេ រួចសន្និដ្ឋានក្នុងចិត្តតែម្នាក់ឯង ដោយថាពួកគេជាមនុស្សវាយឬកជាដើម។

ជាការពិតណាស់ មនុស្សសាមញ្ញ ចូលចិត្តធ្វើការសន្និដ្ឋានជាជាង ការស្វែងរកការពិតដោយចូលទៅសួរដោយផ្ទាល់ ដែលធ្វើឲ្យពួកគេតែងតែយល់ខុសពីការពិតជានិច្ច។

អ្នកមាន តែងមានសំណួរ: អ្នកមានពួកគេតែងចោទសួរមុននឹងពួកគេធ្វើអ្វីមួយដោយថា«តើនឹងមានអ្វីបើសិនជា?» ឧទាហរណ៍: «តើនឹងមានអ្វីបើសិនជាខ្ញុំផ្ញើអ៊ីម៉ែលទៅកាន់នាយករដ្ឋមន្ត្រីហើយគាត់នឹងឆ្លើយតបមកខ្ញុំវិញ?» បើសិនជាអ្នកចាប់ផ្តើមជាសំណួរមុននោះ អ្នកនឹងជួយខ្លួនឯងបានច្រើន ជាជាងធ្វើការសន្និដ្ឋានរួចរាថយ។ អំណាចនិងការពិត ស្ថិតក្នុងដៃរបស់អ្នក បើសិនជាអ្នកសួរត្រូវសំណួរ បន្ទាប់មកធ្វើវា។

៣). មនុស្សសាមញ្ញគិតថាលុយសំខាន់ជាពេលវេលា ប្រាកដណាស់ មនុស្សស្ទើរតែទូទាំងពិភពលោកទៅហើយ ដែលធ្វើការ រកស៊ីដើម្បីរកលុយ។ អ្នកអាចទទួលបានលុយជាច្រើនត្រឡប់វិញ ខណៈអ្នកត្រូវបាត់បង់ពេលវេលាជារៀងរាល់ថ្ងៃដោយសារចំណាយពេលទៅលើការងារនិងការរកស៊ី។ ប៉ុន្តែមិនថាយ៉ាងណា មនុស្សភាគច្រើនតែងតែចំណាយពេលវេលា ស្ទើរតែមួយជីវិតរបស់ពួកគេ ដើម្បីរកលុយសម្រាប់ជីវភាពរស់នៅ ទាំងដែលពេលខ្លះភ្លេចគិតពីសុខភាព និងការធ្វើឲ្យជីវិតរបស់ខ្លួនមានសេចក្តីសុខផងដែរ។

អ្នកមាន គិតថាពេលវេលាសំខាន់ជាងលុយ អ្នកមាន មិនដែលចាយពេលវេលាឥតប្រយោជន៍នោះទេ បើនិយាយឲ្យចំទៅគឺពួកគេចេះចាយពេលវេលាឲ្យមានតម្លៃ ថាពេលណាគួរធ្វើអ្វីពេលណាមិនគួរ ពួកគេចេះរកសេចក្តីសុខយ៉ាងពេញលេញសម្រាប់ខ្លួនឯង ដូចជាការធ្វើកិច្ចការសង្គម ឬក៏ធ្វើដំណើរកម្សាន្តយ៉ាងមានន័យជាមួយគ្រួសារជាដើម។

៤) មនុស្សសាមញ្ញតែងធ្វើការប្រកួតប្រជែង នៅពេលដែលឃើញអ្នកដទៃធ្វើអ្វីមួយកំពុងរីកចម្រើន នោះមនុស្សសាមញ្ញតែងព្យាយាមរិះរកវិធីធ្វើត្រាប់យ៉ាងណា ដើម្បីឲ្យបានដូចគេ។ ជានិច្ចកាល ពួកគេមិនដែលគិតពីវិធីផ្សេងដើម្បីបង្កើតវាដោយខ្លួនឯងនោះទេ ដោយផ្ទុយទៅវិញពួកគេបែរជាគិតថា ការដែលធ្វើតាមអ្នកដទៃគឺជារឿងដ៏ល្អបំផុតសម្រាប់ពួកគេទៅវិញ។

អ្នកមានជាអ្នកបង្កើត ពួកអ្នកមាននៅពេលដែលពួកគេ មិនពេញចិត្តនូវរបស់អ្វីមួយដែលពួកគេកំពុងប្រើប្រាស់ នោះពួកគេនឹងបង្កើតវាថ្មីមួយទៀតឲ្យមានលក្ខណៈពិសេសជាងនោះទ្វេដង។

ឧទាហរណ៍ ដូចជាពេលដែលពួកគេឃើញរថយន្តមួយគ្រឿងដ៏ស្រស់ស្អាត ប៉ុន្តែវាមិនមានលក្ខណៈពិសេសដូចអ្វីដែលពួកគេចង់បាន ដោយមូលហេតុនេះ ពួកគេក៏សម្រេចចិត្តផលិតរថយន្តថ្មីមួយទៀត ដែលមានលក្ខណៈពិសេសទ្វេដងមិនធ្លាប់មានពីមុនមកតែម្តង៕

(khmerload)

មតិយោបល់

ពេញនិយម