រឿងអប់រំ៖ សត្វចាប និងស្រមោច!
Connect with us

បែបផែនជីវិត

រឿងអប់រំ៖ សត្វចាប និងស្រមោច!

ដោយសារតែការប្រកួតប្រជែងដែលកើតមានឡើងជារៀងរាល់ថ្ងៃ បានធ្វើអោយមនុស្សពេលខ្លះលែងសូវគិតពីហេតុផលនានាអ្វីមួយហើយ អោយតែខ្លួនបានល្អ បានប្រយោជន៍ដែលខ្លួនប្រាថ្នា។ ហេតុដូច្នេះហើយបានជា ជារឿយៗតែងតែមានរឿងអប់រំខ្លីៗដើម្បីផ្តល់ជាន័់យអប់រំជួយដល់ការគិតរបស់មនុស្ស អោយងាកមករកភាពជ្រះថ្លាបរិសុទ្ធវិញ។

តួយ៉ាងដូចជារឿងខ្លីខាងក្រោមនេះអញ្ចឹងដែរ ដែលមានព្រោះថា ពេលវេលា និងផលតបស្នង!

រឿងនេះគឺយកចេញពីរឿងពិតពីវដ្តរបស់ជីវិតសត្វពីរក្បាលគឺសត្វចាប់ និងសត្វស្រមោច។ ដោយសារតែចាបមានរាងធំ វាតែងតែទៅចឹកស៊ីសាច់ស្រមោចដែលជាសត្វមានរាងតូចជាងខ្លួនជាអាហារ។ ទម្លាប់ប្រចាំថ្ងៃនេះបានជាធ្វើអោយចាបគិតថាខ្លួនឯងអស្ចារ្យខ្លាំងណាស់ ព្រោះមិនថាខ្លួនចង់ស៊ីស្រមោចច្រើនប៉ុណ្ណា ស្រមោចខ្លួនតូចទាបមិនមានសមត្ថភាពតដៃនឹងខ្លួនបានឡើយ។

កាលដំណាលយូរៗទៅ សត្វចាបកាន់តែមានអាយុចាស់ទ្រុឌទ្រោមទៅៗរបស់ដល់ថ្ងៃមួយវាបានស្លាប់។ ស្មានមិនដល់អី ហ្វូងស្រមោចដែលគួរតែជាចំនីរបស់ចាបកាលដែលវានៅរស់បានមករោមជិតស៊ីសត្វចាប់នោះអស់គ្មានសល់។

សាច់រឿងនេះខ្លីខ្លាំងណាស់ ប៉ុន្តែន័យបង្កប់របស់វាគឺមានន័យជ្រៅបំផុត ព្រោះវាអាចញ៉ាំងអោយមនុស្សភ្លឺភ្នែក ចំពោះរឿងដែលអាចកើតឡើងនៅពេលអនាគត។ ដោយសារតែពុំមាននរណាម្នាក់ដឹងថា នៅថ្ងៃអនាគតនឹងមានរឿងអ្វីកើតឡើងនោះទេ ហេតុដូច្នេះហើយទើបគេតែងបង្រៀនអោយមនុស្សមានការប្រុងប្រយ័ត្នជាមួយទង្វើខ្លួន ក្រែងលោហ៍វាអាចធ្វើប៉ះពាល់ដល់ខ្លួនវិញនៅថ្ងៃក្រោយ។

មនុស្សម្នាក់ៗសុទ្ធតែមានពេលវេលា ឳកាស និងវាសនាផ្សេងៗគ្នា។ មនុស្សដែលអ្នកធ្លាប់មើលងាយថ្ងៃនេះ អាចជាមនុស្សតែមួយដែលអ្នកត្រូវអោនលំទោនដាក់នៅថ្ងៃក្រោយ ដូច្នេះប្រសិនជាអ្នកគ្រអើតគ្រទមនៅថ្ងៃនេះ អ្នកនឹងអាចធ្វើអោយបាត់បង់ប្រយោជន៍របស់ខ្លួននៅថ្ងៃក្រោយ។

អញ្ចឹងហើយជាមនុស្សម្នាក់ប្រកបដោយគុណធម៌ អ្នកត្រូវចេះអោយតម្លៃអ្នកដទៃ ដោយបង្រៀនចិត្តរបស់ខ្លួនអោយចេះគិតថា រឿងអ្វីក៏អាចកើតមានឡើងដែរ ដូច្នេះមុនពេលស្តាយក្រោយអ្វីមួយ អ្នកគួរធ្វើអោយល្អអោយបានច្រើនវិញល្អជាង៕

អត្ថបទល្អផ្សេងទៀត៖ រឿងអប់រំខ្លីតែមានន័យជ្រាលជ្រៅ៖ ឪពុកជាអ្នកក្រអាចអប់រំកូនប្រុសឱ្យក្លាយជាអ្នកមានបានទេ?

រៀងរាល់ថ្ងៃ ឪពុកតែងតែនាំកូនប្រុសរបស់ខ្លួនទៅសាលារៀន និងពេលចេញពីសាលារៀនគាត់នតែជិះកង់ទៅទទួលកូនប្រុសសំណព្វចិត្តរបស់គាត់ឥតដែលនឿយហត់ និងខ្ជិលម្តងណាឡើយ ព្រោះតែក្តីស្រឡាញ់ចំពោះកូន និងចង់ឃើញ​កូនប្រុស​មាន​ចំណេះដឹង សង្ឃឹមថាកូនប្រុសរបស់គាត់ក្លាយជាមនុស្សម្នាក់ល្អនៅក្នុងសង្គមបាន។

ប៉ុន្តែជាចៃដន្យថ្ងៃមួយនោះ គាត់បានឃើញកាបូបលុយមួយធ្លាក់នៅពីមុខគាត់ និងកូនប្រុសរបស់គាត់។ ពេលជិះដល់កាបូប​លុយនេះ គាត់ឈប់កង់ ហើយមិនព្រមរើសយកភ្លាមៗទេ ដោយគាត់បានគិតក្នុងចិត្តតែម្នាក់ឯងថា «ក្នុងនាមអញជាឪពុកល្អ​ម្នាក់របស់កូនប្រុសអញ ដូច្នេះអញមិនគប្បីធ្វើទង្វើអាក្រក់ ឬមិនល្អជាគំរូមិនល្អដល់កូនអញឡើយ»។

គិតនៅក្នុងចិត្ត​រួចហើយ គាត់បាននិយាយទៅកាន់កូនប្រុសរបស់គាត់ថា «កូនប្រុសហា៎! ថ្វីបើពុកមិនមានទ្រព្យសម្បត្តិច្រើនពិតមែន ប៉ុន្តែពុក​មិនដាច់ចិត្ត​ធ្វើជាមនុស្សអាក្រក់ដើម្បីរកប្រាក់ឡើយ គឺពុកពឹងលើកម្លាំងញើសឈាមពុក ដើម្បីចិញ្ចឹមកូនរហូតបានប៉ុណ្ណេះ ហើយ​ថ្ងៃ​នេះយើងរើសបានកាបូបនេះ មានសុទ្ធតែប្រាក់ក្នុងកាបូប ប៉ុន្តែកូនត្រូវចាំថាលុយនេះមិនមែនជារបស់យើងទេ ដូច្នេះគឺយើង​នឹង​ថែរក្សាទុកជូនម្ចាស់គេវិញ!»។

កូនប្រុសគាត់ញញឹមដាក់គាត់ ហើយក៏គិតក្នុងចិត្តថា «ពុកខ្ញុំ គឺជាមនុស្សល្អគួរឲ្យគោ​រព​ ទោះបីក្រក៏គាត់មិនដែលចង់បានរបស់អ្នកដទៃដែរ ហើយជាគំរូល្អបំផុតសម្រាប់ខ្ញុំជាកូន»។

គាត់សម្រេចចិត្តរើសកាបូបនោះទុកសិន តែគាត់មិនបានប៉ះពាល់លុយនៅក្នុងនោះសូម្បីតែបន្តិចឡើយ។ ថ្ងៃស្អែកទៀត គាត់ក៏​បាន​នាំកូនមកសាលារៀនដូចសព្វដង ហើយក៏បានឃើញអ្នកដំណើរកំពុងតែស្វែងរកអ្វីម្យ៉ាងនៅកន្លែងកើតហេតុ (កន្លែង​គាត់​រើសបានកាបូបកាលពីម្សិលមិញ) ដូច្នេះគាត់បានសួរនៅកាន់បុរសចំណាស់បន្តិចថា «អត់ទោស! តើលោកកំពុង​ស្វែង​រករបស់​អ្វីឬ?» កាលពីម្សិលមិញ ខ្ញុំមកទទួលកូនចេញពីរៀន ហើយបានជ្រុះបាត់កាបូបតាំងពីម្សិលមិញមកម្ល៉េះ សង្ស័យជ្រុះបាត់​តាមផ្លូវនេះ តែខ្ញុំរកមិនឃើញសោះ!​

បុរសម្នាក់ដែលជាឪពុកអ្នកក្រជិះកង់នោះ បានលូកដៃចូលក្នុងហោប៉ាវ ហើយហុច​ទៅ​​ឲ្យបុរសចំណាស់នោះ រួចសួរថា តើជារបស់នេះឬ? គាត់ស្រងាកចិត្តមើលមុខបុរសដែលហុចកាបូបនោះ រួចហែកមើល​កាបូប​របស់គាត់ គ្មានបាត់លុយមួយសេនណាឡើយ។

នៅក្នុងចិត្តរបស់បុរសចំណាស់នោះ គាត់មិននឹកស្មានថាអាចរកឃើញកាបូបលុយវិញទេ ហើយរឹតតែមិននឹកស្មានថា មានមនុស្ស​ល្អដូចជាឪពុកជាអ្នកក្រជិះកង់នោះដែរ។

បុរសទាំងពីរនាក់នោះ បានរាប់អានគ្នាជាមិត្ត និងសាងមិត្ដរហូតដល់​កូនៗ​របស់ពួកគេធំ មិនតែប៉ុណ្ណោះកូនប្រុសដែលមានឪពុកជាអ្នកក្រ ត្រូវបានជួយទំនុកបម្រុងពីឪពុកដែលបាត់កាបូបលុយនេះ​ទាល់​តែរៀនចប់ និងជោគជ័យក្នុងជីវិតយ៉ាងត្រចេះត្រចង់ ដោយសារតែធ្វើទង្វើល្អតាមគន្លងរបស់ឪពុកបង្រៀនសាង​ខ្លួនជា​មនុស្សល្អ។

ក្នុងសាច់រឿងនេះ បានបង្ហាញអំពីចំណុចពីរយ៉ាងដែលយើងគួររៀនសូត្រ។ ចំណុចទី១ គឺបង្រៀនឲ្យយើងចេះជួយគ្នា កុំចង់បាន​របស់អ្នកដទៃ ដែលមិនមែនជារបស់ខ្លួន។

ចំណុចទី២ គឺការបង្រៀនកូនកុំឲ្យក្លាយជាមនុស្សអាក្រក់ ចង់បានរបស់គេ ជា​ពិសេសឪពុកជាអ្នកក្រ មានគំនិតមិនចង់បង្ហាញឲ្យកូនឃើញពីទង្វើមិនល្អ ឬការបង្រៀនដោយប្រយោលចំពោះកូន​របស់ខ្លួន ដែលកាត់បន្ថយនូវអំពើពុករលួយនៅក្នុងសង្គម ចេះយកអាសាគ្នា ពិតសក្តិមជាឪពុកគំរូមែន។

ហេតុនេះឱពុកអ្នកក្រ (ក្រទ្រព្យ) ក៏អាចអប់រំកូនឱ្យក្លាយជាអ្នកមាន (ចំណេះវិជ្ជា និងចរិយាសម្បត្តិថ្លៃថ្នូរ) បានដែរដែលជាគ្រឹះដ៏រឹងមាំក្នុងការកសាងទ្រព្យ៕

មតិយោបល់

ពេញនិយម