ចៀសវាងដាច់ខាត! កុំនិយាយសម្ដីទាំង ៥ នេះទៅកាន់ចៅហ្វាយរបស់អ្នក!

កន្លែងធ្វើការអាចជាទីកន្លែងដែលពោរពេញទៅដោយសម្ពាធចំពោះមនុស្សមួយចំនួន។ មុនពេលនិយាយរឺធ្វើអ្វីមួយ ពួកគេតែងតែត្រូវគិតគូរឲ្យច្បាស់ជាមុន ដោយពួកគេខ្លាចត្រូវគេវាយតម្លៃថាជាបុគ្គលិកមិនល្អ។ ដូច្នេះហើយ ដើម្បីបង្កើតទំនាក់ទំនងដ៏ល្អមួយជាមួយនឹងអ្នកគ្រប់គ្រងរឺចៅហ្វាយរបស់អ្នក អ្នកត្រូវចៀសវាងនិយាយសម្ដីទាំង ៥ ខាងក្រោមនេះ!

១. អត់ដឹងទេ!

នៅពេលដែលចៅហ្វាយសួរអ្នកពីរឿងអ្វីមួយ វាមានន័យថា គាត់ត្រូវការចម្លើយរឺត្រូវការជំនួយរបស់អ្នក។​ ដូច្នេះហើយ អ្នកមិនអាចនិយាយត្រឹមតែ អត់ដឹង ប៉ុណ្ណឹងនោះទេ។ អ្នកអាចនិយាយប្រាប់បន្ថែមថា អ្នកនឹងជួយស្វែងរកព័ត៌មានជូនគាត់ រឺអ្នកនឹងព្យាយាមរកមធ្យោបាយផ្សេងៗ។

២. ខ្ញុំអត់មានពេលទេ!

នៅពេលដែលចៅហ្វាយប្រាប់អ្នកឲ្យធ្វើអ្វីមួយ ហាមដាច់ខាតនិយាយថា ទេ មិនថាអ្នកពិតជារវល់រឺគ្មានពេលទំនេរយ៉ាងណានោះទេ។ ជាជាងការបដិសេធ អ្នកអាចប្រាប់គាត់ពីការងារដទៃទៀតដែលអ្នកត្រូវធ្វើ ហើយសុំឲ្យគាត់ជួយកំណត់ការងារអាទិភាពសម្រាប់អ្នក។

៣. តើខ្ញុំអាចចេញមុនម៉ោងបានទេ?

អ្នកប្រហែលជាមានការណាត់ជួបរឺការប្រជុំសំខាន់អ្វីមួយ ហើយការសុំចេញមុនដោយសារមានមូលហេតុបែបនេះគឺមិនជាបញ្ហានោះទេ។ ប៉ុន្ដែអ្នកមិនគួរសុំចេញមុនម៉ោង ដោយសារតែអ្នកអផ្សុក រឺដោយសារអ្នកបានបញ្ចប់ការងាររួចរាល់អស់ហើយនោះទេ។ អ្នកត្រូវរកអ្វីផ្សេងដើម្បីធ្វើ រឺក៏ជួយមិត្តរួមការងារ ដើម្បីបង្ហាញឲ្យចៅហ្វាយអ្នកឃើញថា អ្នកជាបុគ្គលម្នាក់ដែលឧស្សាហ៍និងចេះជួយអ្នកដទៃ។

៤. មិនមែនកំហុសខ្ញុំទេ!

ប្រសិនបើអ្នកពិតជាមិនបានដឹងរឿងអ្វីមែន ចូរបកស្រាយប្រាប់ចៅហ្វាយរបស់អ្នកតាមសម្រួល។ ចៀសវាងការទម្លាក់កំហុសដាក់អ្នកដទៃ ជាពិសេស​នៅពេលដែលអ្នកមិនបានដឹងច្បាស់។ ចូរបង្ហាញថាអ្នកជាមនុស្សដែលមានទំនួសខុសត្រូវ និងចេះសាមគ្គីគ្នាក្នុងក្រុម ជាជាងការស្ដីបន្ទោសអ្នកដែលធ្វើខុស។

៥. ការសួរសំណួរមិនចាំបាច់នានា

អ្វីទៅទើបហៅថា សំណួរមិនចាំបាច់? សំណួរណាដែលអ្នកអាចរកចម្លើយបានដោយខ្លួនឯង មិនថាតាមរយៈវេបសាយលើប្រព័ន្ធអ៊ីនធឺណេត រឺការសួរមិត្តរួមការងារដទៃទៀតនោះទេ។ ឧទាហរណ៍ អ្នកចង់ដឹងពីលេខទូរស័ព្ទរបស់នរណាម្នាក់ រឺក្រុមហ៊ុនអ្វីមួយ។ ចូរស្វែងរកព័ត៌មាននោះដោយខ្លួនឯង រឺសួរអ្នករួមក្រុមជាមុនសិន មុននឹងទៅរកចៅហ្វាយរបស់អ្នក៕

ប្រភព៖ Lifehack

អត្ថបទល្អផ្សេងទៀត៖ ហេតុផលដែលអ្នកគួរ និងមិនគួរប្រើ ពេលសុំចេញពីធ្វើការមុនម៉ោង!

នៅក្នុងជីវិតការងារ មិនថាអ្នកចង់រឺមិនចង់ តែងតែមានពេលមួយដែលអ្នកត្រូវបានកាលះទេសះបង្ខំអោយសុំច្បាប់ឈប់សម្រាក រឺសុំចេញពីធ្វើការហើយ។ ការសុំចេញពីធ្វើការមុនម៉ោង មិនមែនជារឿងអ្វីដែលគួរអោយខ្មាសអៀន រឺភ័យខ្លាចនោះឡើយ ប្រសិនណាជាអ្នកមានហេតុផលត្រឹមត្រូវដើម្បីសុំចេញនោះ។

តើហេតុផលណាខ្លះដែលចាត់ទុកថាស័ក្តសម និងមិនស័ក្តសមនៅក្នុងការសុំច្បាប់ចេញមុនម៉ោង?

ហេតុផលដែលត្រឹមត្រូវ៖

១. ប្រសិនជាអ្នកត្រូវទៅចូលរួមពិធីណាមួយដែលពាក់ព័ន្ធជាមួយនឹងការងារ ឧទាហរណ៍ដូចជាការត្រូវបានគេអញ្ចើញហៅអោយចូលរួមជាដើម។ ការចូលរួមបែបនេះអាចនឹងធ្វើអោយអ្នកបង្កើតបានបណ្តាញល្អៗជាច្រើន ដែលអាចជួយអ្នកសម្រេចការងារបានជោគជ័យជាងមុន។

២. ប្រសិនជាអ្នកត្រូវចូលរួមកម្មវិធីបណ្តុះបណ្តាលរឺ សិក្ខាសិលាអ្វីមួយផ្សេងៗដែលអាចផ្តល់ជាចំណេះដឹងដល់អ្នក និងជួយអោយការងារអ្នកអាចធ្វើបានដោយរលូនជាងមុន។

៣. ប្រសិនជាអ្នកមានបញ្ហាដែលទាក់ទងនឹងក្រុមគ្រួសារ ដូចជាសមាជិកក្នុងក្រុមគ្រួសារណាម្នាក់មានរឿងអាសន្នដែលត្រូវការវត្តមានអ្នក រឺប្រសិនជាផ្ទះរបស់មានបញ្ហាអ្វីមួយត្រូវការការដោះស្រាយ។

៤. ប្រសិនជាអ្នកមានបញ្ហាផ្ទាល់ខ្លួន ដូចជាមិនស្រួលខ្លួនខ្លាំងមិនអាចបំពេញការងារបន្តទៀត រឺត្រូវធ្វើឯកសារផ្ទាល់ខ្លួនអ្វីមួយដែលពាក់ព័ន្ធនឹងម៉ោងធ្វើការជាដើម។

ហេតុផលដែលអ្នកមិនគួរប្រើប្រាស់៖

១. ប្រសិនជាអ្នកមានភាពធុញទ្រាន់ រឺមិនសូវមានការងារធ្វើនៅកន្លែងធ្វើការ។

២. ប្រសិនជាអ្នកមិនស្រួលខ្លួនដោយសារតែអ្នកបានទទួលទានជាតិស្រវឹងពីម្សិលមិញ រឺពីពេលណាមក ដែលធ្វើអោយអ្នកមិនអាចបំពេញការងារបាន។ ប្រសិនជាអ្នកមានបញ្ហាបែបនេះ អ្នកមិនត្រូវបញ្ជាក់មូលហេតុដែលអ្នកមិនស្រួលខ្លួនឡើយ។

៣. ប្រសិនជាអ្នកត្រូវទៅដើរកំសាន្តជាមួយមិត្តភក្តិ រឺត្រូវទៅចូលរួមកម្មវិធីមិនសូវសំខាន់មួយចំនួនដូចជាខួបកំណើតរបស់មិត្តភក្តិជាដើម។

៤. ប្រសិនជាអ្នកត្រូវទៅសម្ភាសការងារជាមួយក្រុមហ៊ុនផ្សេង ដែលអ្នកបានដាក់ពាក្យព្រោះចង់ឈប់ពីក្រុមហ៊ុនបច្ចុប្បន្ន។ ៥. ប្រសិនជាអ្នកមានបញ្ហាបន្តិចបន្តួចនៅក្នុងក្រុមហ៊ុន នៅក្នុងក្រុមគ្រួសារ រឺផ្ទាល់ខ្លួនជាដើម៕