តើមនុស្សឆ្លាតធ្វើបែបណាជាមួយនឹងមនុស្សដែលពួកគេមិនចូលចិត្ត?
Connect with us

បែបផែនជីវិត

តើមនុស្សឆ្លាតធ្វើបែបណាជាមួយនឹងមនុស្សដែលពួកគេមិនចូលចិត្ត?

ពិភពលោកដែលល្អឥតខ្ចោះមួយក្នុងក្ដីស្រមៃរបស់មនុស្សគ្រប់គ្នាគឺប្រហែលជាទីកន្លែងមួយ ដែលមនុស្សជុំវិញខ្លួនសុទ្ធជាមនុស្សដែលស្រលាញ់រាប់អានអ្នក ចិត្តល្អ ចេះយោគយល់ ចេះគិតគូរ មានមេត្តាធម៌ រឺក៏អត្តចរិតល្អផ្សេងៗទៀត។ ប៉ុន្ដែអ្វីដែលជាទិដ្ឋភាពពិតប្រាកដនោះគឺមិនដូច្នោះទាំងស្រុងនោះទេ។ មនុស្សម្នាក់ៗសុទ្ធតែខុសពីគ្នា ហើយយើងជៀសមិនផុតពីការដែលត្រូវបង្ខំចិត្តធ្វើការជាមួយមនុស្សដែលយើងមិនចូលចិត្ត ដោយសារតែអត្តចរិតខុសគ្នារឺមូលហេតុដទៃទៀត។ តើគួរធ្វើបែបណា ប្រសិនបើមិត្តរួមក្រុមរឺរួមការងាររបស់អ្នក ជាមនុស្សដែលមិនត្រូវនឹងអ្នក? ខាងក្រោមនេះជារបៀបដែលមនុស្សឆ្លាតដោះស្រាយជាមួយមនុស្សដែលពួកគេមិនចូលចិត្ត។

១.​ ទទួលស្គាល់ការពិត៖ អ្នកត្រូវទទួលស្គាល់ការពិតថា មនុស្សសុទ្ធតែមានលក្ខណៈខុសប្លែកពីគ្នាពីម្នាក់ទៅម្នាក់ ដែលធ្វើឲ្យមនុស្សឲ្យតម្លៃផ្សេងគ្នានិងមានការគិតខុសគ្នា។ ការទទួលស្គាល់បែបនេះអាចធ្វើឲ្យអ្នកមានធូរចិត្តបន្ដិច នៅពេលដែលត្រូវធ្វើការជាមួយមនុស្សដែលមិនចុះសម្រុងនឹងអ្នក។

២. មិនបោះបង់ចោលពួកគេ៖ ការមានយោបល់ផ្សេងគ្នាអាចជារឿងល្អ ដោយសារតែការជជែកវែកញែកនឹងជួយឲ្យក្រុមរបស់អ្នករកមធ្យោបាយដ៏ល្អបាន។ ដូច្នេះហើយ អ្នកមិនគួរប្រងើយកន្ដើយដាក់ពួកគេ រឺបោះបង់ចោលនោះទេ។ វាប្រហែលជាមិនងាយស្រួលនោះទេ តែអ្នកគួរតែទ្រាំបើអាច។

៣. រក្សាភាពថ្លៃថ្នូរ៖ ប្រសិនបើអ្នកមិនគួរសមដាក់ពួកគេ ពួកគេក៏អាចមិនគួរសមដាក់អ្នកវិញផងដែរ។ ដូច្នេះ ចូររក្សាភាពវិជ្ជមាននិងភាពថ្លៃថ្នូររបស់អ្នក ដោយមិនបន្ទាបខ្លួនទៅនឹងកម្រិតរបស់អ្នកទាំងនោះ។

៤. ពិចារណាការរំពឹងទុករបស់ខ្លួនឯង៖ ពេលខ្លះ វាអាចបណ្ដាលមកពីការដែលអ្នករំពឹងថា អ្នកដទៃធ្វើរឺនិយាយដូចអ្នកដែរ ប៉ុន្ដែការគិតបែបនេះហើយដែលធ្វើឲ្យអ្នកមានការខកចិត្តរឺខឹងសម្បា។ មនុស្សឆ្លាតមានការរំពឹងទុកដ៏សមរម្យមួយ ទើបពួកគេមិនមានការភ្ញាក់ផ្អើលដោយសារតែអាកប្បកិរិយារបស់មនុស្សដែលមិនពេញចិត្ត។

៥. ផ្ដោតលើខ្លួនឯង៖ ជាជាងការគិតពីមនុស្សដែលធ្វើឲ្យអ្នកមិនពេញចិត្ត ចូរសួរខ្លួនឯងវិញថា ហេតុអ្វីបានជាអ្នកមានប្រតិកម្មបែបនេះចំពោះពួកគេ ដោយសារពេលខ្លះ អ្វីដែលយើងមិនពេញចិត្តក្នុងអ្នកដទៃក៏ជាអ្វីដែលអ្នកមិនចូលចិត្តពីខ្លួនឯងផងដែរ។ ចូរចងចាំថា ការកែប្រែខ្លួនឯងគឺតែងតែងាយស្រួលជាងការដែលអ្នកចង់កែប្រែអ្នកដទៃ។

៦. ដកដង្ហើមវែងៗ៖ ការដកដង្ហើមវែងៗនឹងជួយឲ្យអារម្មណ៍របស់អ្នកស្ងប់និងការពារមិនឲ្យអ្នកមានប្រតិកម្មហួសហេតុ ព្រមទាំងជួយអ្នកឲ្យបើកចិត្តទូលាយផងដែរ។

៧. ប្រាប់ឲ្យពួកគេដឹង៖ ប្រសិនបើពួកគេនៅតែបន្ដធ្វើឲ្យអ្នកទាស់ចិត្តឥតឈប់ឈរ អ្នកគួរតែនិយាយប្រាប់ឲ្យពួកគេបានដឹងតាមសម្រួល។ ជៀសវាងប្រើពាក្យមិនសមរម្យដែលអាចធ្វើឲ្យបញ្ហាកាន់តែធំ។

៨. រក្សាគម្លាត៖ បើព្យាយាមវិធីខាងលើអស់ហើយតែគ្មានប្រសិទ្ធភាព​ អ្នកគួររក្សាគម្លាតពីពួកគេមួយរយៈពេលសិន។ ការធ្វើបែបនេះអាចជួយឲ្យទំនាក់ទំនងរបស់អ្នកប្រសើរឡើងវិញបន្ទាប់ពីមួយរយៈពេលនេះក៏ថាបាន៕

ប្រភព៖ Lifehack

អត្ថបទល្អផ្សេងទៀត៖ ធ្វើយ៉ាងណាទើបគេហៅថា ធ្វើការដោយភាពឆ្លាតវៃ? គន្លឹះទាំង ៨ នេះអាចជួយអ្នកបាន!

កាល​ពីមុន មនុស្សម្នាក់ៗតែងមានផ្នត់គំនិតថា ដើម្បីសម្រេចបានជោគជ័យក្នុងការធ្វើអ្វីមួយ យើងត្រូវតែខិតខំប្រឹងប្រែង។ ដោយឡែក ក្នុងពេលបច្ចុប្បន្ន ដោយសារតែការខិតខំត្រូវចំណាយពេលវេលានិងកម្លាំងអស់ច្រើន មនុស្សមួយចំនួនចាប់ផ្ដើមឲ្យដំបូន្មានថា “កុំខំ! ធ្វើអីក៏ដោយ ឲ្យចេះឆ្លាត!”​ ប៉ុន្ដែពួកគេមិនបានប្រាប់នោះទេថា តើការធ្វើការដោយភាពឆ្លាតវៃនោះគឺមានលក្ខណៈបែបណា? ធ្វើបែបណាទើបគេហៅថាឆ្លាតនោះ? ខាងក្រោមនេះជាគន្លឹះទាំង ៨ ដែលអាចជួយអ្នកបាន។

១. គ្រប់គ្រងពេលវេលា៖ ធ្វើបែបណាទើបហៅថាគ្រប់គ្រងពេលវេលាបានល្អ? អ្នកត្រូវកំណត់អាទិភាពនៃកិច្ចការរបស់អ្នក ថាតើការងារណាដែលសំខាន់និងបន្ទាន់ជាងគេ។ ចូរកុំព្យាយាមធ្វើកិច្ចការច្រើនក្នុងពេលតែមួយ។ អ្នកត្រូវចេះសន្មត់ថា ការងារមួយចំណាយពេលប្រហែលប៉ុន្មាន ហើយអ្នកត្រូវបញ្ចប់ការងារមួយនេះត្រឹមពេលណា។

២. ប្រើប្រាស់បច្ចេកវិទ្យាជំនួយ៖ ពេលណាដែលបច្ចេកវិទ្យាអាចជួយអ្នកបាន អ្នកគួរតែប្រើវាដើម្បីកាត់បន្ថយការចំណាយពេលវេលានិងកម្លាំងកាយរបស់អ្នក។ ឧទារហណ៍ អ្នកអាចប្រើប្រាស់កុំព្យូទ័រក្នុងការស្រាវជា្រវរកឯកសារ ប្រើប្រាស់ទូរស័ព្ទក្នុងការទំនាក់ទំនងរឺបង្កើតបញ្ជីការងារដែលត្រូវធ្វើជាដើម។

៣. មានរបៀបរៀបរយ៖ មនុស្សដែលមានផលិតភាពខ្ពស់ច្រើន​​ ជាមនុស្សដែលចេះរៀបចំឲ្យមានលំដាប់លំដោយត្រឹមត្រូវ។ បើទោះបីជាការរៀបចំ ដូចជាឯកសារ រឺសៀវភៅ អាចចំណាយពេលជាងការទុកដាក់គ្មានសណ្ដាប់ធ្នាប់ក៏ពិតមែន ប៉ុន្ដែវាអាចជួយសន្សំពេលវេលាបានយ៉ាងច្រើននៅពេលដែលអ្នកត្រូវការរកឯកសារទាំងនោះ ហើយសណ្ដាប់ធ្នាប់ល្អក៏អាចនាំឲ្យអ្នកមានអារម្មណ៍ក្នុងការធ្វើការងារផ្សេងៗផងដែរ។

៤. សម្រាកបន្ដិចឲ្យបានញឹកញាប់៖ សូម្បីែតមនុស្សដែលរវល់បំផុតក៏ត្រូវការពេលសម្រាកខ្លះដែរ។ ចំណាយពេល ៥ ទៅ ១០ នាទី ដើរចេញពីតុ ពត់ដៃពត់ជើង ទៅនិយាយជាមួយមិត្តភក្ដិ ទៅញ៉ាំទឹក ទៅញ៉ាំផ្លែឈើ រឺធ្វើអ្វីផ្សេងៗទៀតតាមដែលអ្នកចង់។ វានឹងជួយបន្ធូរភាពតានតឹងរបស់អ្នកនិងធ្វើឲ្យអ្នកអាចធ្វើការកិច្ចការអ្វីមួយយ៉ាងមានប្រសិទ្ធភាពផងដែរ។

៥. បដិសេធការងារមិនសំខាន់៖ ពាក្យថា “ទេ” គឺជាពាក្យមួយដែលពិបាកនឹងនិយាយចេញសម្រាប់មនុស្សមួយចំនួន។ ពួកគេតែងតែយល់ព្រមក្នុងការធ្វើអ្វីគ្រប់យ៉ាង ប៉ុន្ដែបើប្រសិនបើអ្វីដែលអ្នកធ្វើនោះមិនមែនជាចំណង់ចំណូលចិត្ត រឺអាទិភាពរបស់អ្នកទេ ចូរបដិសេធនឹងសំណើនោះ។

៦. ប្រគល់ការងារឲ្យអ្នកដទៃ៖ នេះមិនមែនមានន័យថា អ្នកកំពុងតែធ្វើបាបពួកគេនោះទេ ប៉ុន្ដែវាជាឪកាសដែលអ្នកដទៃអាចរៀនពីការងារនោះបាន។ ដូច្នេះហើយ អ្នកមិនគួរស្រវាចាប់យកកិច្ចការទាំងអស់មកធ្វើខ្លួនឯងនោះទេ។ ចូរបែងចែកវាឲ្យទៅមិត្តរួមការងាររបស់អ្នក ដើម្បីភាពល្អប្រសើរទាំងសងងខាង។

៧. កុំទាមទារភាពល្អឥតខ្ចោះ៖ វាជារឿងកម្រដែលយើងធ្វើអ្វីមួួយបានល្អឥតខ្ចោះ ហើយវាក៏មិនមែនជារឿងចាំបាច់អីនោះដែរ។ ការទាមទារភាពល្អឥតខ្ចោះនេះអាចបណ្ដាលឲ្យអ្នកមានទំនាក់ទំនងមិនល្អជាមួយអ្នករួមការងាររឺសមាជិកក្រុម មានការពន្យាពេល មានផលិតភាពទាប ហើយក៏អាចនាំមកនូវភាពតានតឹងនិងការបាក់ទឹកចិត្តផងដែរ។ 

៨. ដឹងពេលត្រូវសុំជំនួយ៖ មិនថាមនុស្សឆ្លាតពូកែប៉ុណ្ណានោះទេ អ្នកអាចនឹងជួបការងារពិបាកដែលធ្វើឲ្យអ្នកធុញថប់ជាខ្លាំង។ ឈប់ព្យាយាមធ្វើជាវីរៈនារី រឺ វីរៈបុរសទៀត ហើយកុំសម្ងំរងទុក្ខម្នាក់ឯង។ សុំជំនួួយពីប្រធានរបស់អ្នកនៅកន្លែងធ្វើការ រឺលោកគ្រូអ្នកគ្រូ បើអ្នកជាសិស្ស៕

មតិយោបល់

ពេញនិយម