គួរឱ្យចាប់អារម្មណ៍! តើស្នេហាសម័យបុរាណ និងស្នេហាសម័យបច្ចុប្បន្នខុសគ្នាដូចម្ដេចខ្លះទៅ?

ស្នេហាក្នុងបុរាណកាលខ្មែរ មានអត្ថន័យធំទូលំទូលាយ ស្មោះស្ម័គ្រនឹងគ្នា លះបង់ និងមានបង្គប់វប្បធម៌នៃជាតិសាសន៍ខ្មែរទាំងមូលនាសម័យកាលណោះ។ ប៉ុន្តែ​ប្រសិនបើយើងធៀបគ្នាមកសម័យបច្ចុប្បន្នវិញ ហាក់មានភាពខុសគ្នាឆ្ងាយពីសម័យកាល​មុនៗ ទាំងអត្ថន័យ និងវប្បធម៌និយម ដែលឃ្លាតឆ្ងាយអំពីប្រពៃណីទំនៀមទម្លាប់ខ្មែរយ៉ាងខ្លាំង ព្រោះស្នេហាសម័យ​ ភាគច្រើនតែងផ្តោតលើការសប្បាយ ភាពហឺុហា សុីវិល័យ និងមាសប្រាក់ជាដើម។

សម្រាប់អ្នកដែលពុំសូវមានទ្រព្យសម្បត្តិ និងបុណ្យស័ក្តិ លុកកាក់ អាចនឹងត្រូវបានគេទាត់ចោល ឬមើលងាយដោយខ្វះធន​ធាន។​ ប៉ុន្តែសម័យកាលមុន យើងផ្តោតលើអត្តចរិតថ្លៃថ្នូរ មានសីលធម៌ ចេះគោរពចាស់ទុំ និងមានការអប់រំល្អក្នុង​សង្គម ឬឧស្សាហ៍ព្យាយាមក្នុងការងារ ពេលនោះគេនឹងលើកកូនក្រមុំជូនពុំខាន។

ដោយសារតែកាលវេលាកន្លងទៅពីមួយកាលៗ ដូច្នេះ​ការប្រែប្រួលក៏បានផ្លាស់ប្តូរ ពីតឹងរឹង មកធូរលុង ពីថ្លៃថ្នូរខ្ពង់ខ្ពស់ មកជាខ្វះសីលធម៌ និងមិនសូវចេះខ្មាសអៀនជាដើម។

ក្នុងនាមយើងជាប្រទេសដែលមានវប្បធម៌ និងអរិយធម៌ខ្ពង់ខ្ពស់ ត្រូវតែចេះរក្សាឱ្យបានភាពថ្លៃថ្នូរនេះ ដើម្បីរក្សាឱ្យបាននូវកេរដំណែលដូនតាខ្មែរ និងបង្ហាញប្រាប់ដល់ពិភពលោក។ គប្បីកុំយកតម្រាប់តាមបរទេសជ្រុលពេក ដែលនាំឱ្យបាត់បង់នូវអត្តសញ្ជាតិជាតិខ្លួន គ្មានវប្បធម៌ និងឥតមានអត្តសញ្ញាណជាតិត្រឹមត្រូវ។

សព្វថ្ងៃនេះ ក៏មានប្រទេសជិតខាង កំពុងតែលួចបំភ្លៃប្រវត្តិសាស្ត្រ​ខ្មែរ ថាវប្បធម៌ខ្មែរ ប្រពៃណីទំនៀមទម្លាប់ អក្សរសាស្ត្រជាដើម គឺជារបស់ពួកគេ ដោយឥតមានអៀនខ្មាស​សោះឡើយ។ ដូច្នេះហើយ ក្នុងនាមជាម្ចាស់ស្រុក ត្រូវតែខិតខំផ្សព្វផ្សាយ និងបន្តការការពារបន្ថែមឱ្យបានគង់វង្ស៕

ផ្ដល់សិទ្ធិ៖ monovichea

មតិយោបល់