តើអ្នកដឹងទេ ការរលាយទឹកកកនៅតំបន់ប៉ូលមិនត្រឹមតែបង្កទឹកជំនន់ទេ ប៉ុន្តែវាថែមទាំង…

ការឡើងកម្តៅផែនដី គឺជាកង្វល់ដែលអ្នកជំនាញ និងអ្នកវិទ្យាសាស្ត្រជាច្រើនសុទ្ធតែមានការព្រួយបារម្ភយ៉ាងខ្លាំង។ បាតុភូតមួយនេះបានត្រូវបានបង្ហាញអោយគេដឹងកាន់តែច្បាស់តាមរយះការរលាយដុំទឹកកកធំៗនៅឯតំបន់ប៉ូល ដែលពីមុនត្រូវបានគ្រប់ដណ្តប់យ៉ាងខ្លាំងដោយដុំទឹកកកក្រាស់ៗ។

ការរលាយទឹកកកនៅតំបន់ប៉ូលនេះត្រូវបានគេប៉ាន់ស្មានថានឹងអាចបង្កជាទឹកជំនន់យ៉ាងធ្ងន់ធ្ងរ ព្រោះថាវាធ្វើអោយនាវ៉ូទឹកកើនឡើងខុសពីធម្មតា។ ជាលទ្ធផល ទីក្រុង និងតំបន់ផ្សេងៗជាច្រើនដែលនៅជិតមាត់សមុទ្រ អាចនឹងត្រូវលេចបាត់អស់ចូលទៅក្រោមបាតសមុទ្រផងក៏ថាបាន។

ទោះបីជាបែបនេះក៏ដោយ នេះមិនមែនជាបញ្ហាតែមួយគត់នោះទេដែលអាចផ្តល់ជាកង្វល់ដល់មនុស្សលោក។ អ្នកវិទ្យាសាស្ត្របានរកឃើញថា នៅពេលដែលទឹកកករលាយ វាមិនមែននាំមកនូវជាតិទឹកនោះទេ ប៉ុន្តែវាក៏បាននាំមកទាំងមេរោគ និងបាក់តេរីផ្សេងៗដែលនៅក្នុងនោះផងដែរ អោយហូរចូលមកនៅក្នុងបរិស្ថានដែលយើងកំពុងរស់នៅ។

នៅពេលដែលទឹកកកមិនទាន់រលាយ មេរោគវីរុសដែលកាចសាហាវទាំងនោះសុទ្ធតែត្រូវបានឃុំទុកជាប់ដោយដុំទឹកកកតាំងពីរាប់ពាន់ឆ្នាំមកម្ល៉េះ ប៉ុន្តែនៅពេលទឹកកករលាយ វានឹងចាប់ផ្តើមឥទ្ធិពលរបស់វាឡើយវិញ។

ដោយសារតែវីរុសទាំងនោះសុទ្ធតែមិនធ្លាប់មាននៅក្នុងការសិក្សាកន្លងមក ប្រសិនជាវាបង្កជាគ្រោះថ្នាក់អសន្តរោគអ្វីមួយ អ្នកវិទ្យាសាស្ត្រនឹងត្រូវបានចំនាយពេលយូរមួយដើម្បីសិក្សាពីវាទម្រាំតែអាចរកឃើញដំណោះស្រាយ។

ដូច្នេះហើយមុនពេលដែលបញ្ហាទាំងនោះមកដល់យើង យើងគួរនាំគ្នាជួយថែរក្សាបរិស្ថាន និងព្រៃឈើដែលនៅសេសសល់ ដើម្បីជួយកុំអោយគ្រោះថ្នាក់នេះមកលឿនពេក៕

អត្ថបទល្អផ្សេងទៀត៖ ពន្លឺតំបន់ប៉ូលជាបាតុភូតធម្មជាតិដ៏អស្ចារ្យ ដែលអ្នកគួរនាំមនុស្សជាទីស្រឡាញ់ទៅទស្សនាម្ដងក្នុងមួយជីវិត!

ថ្ងៃនេះ Anarchak សូមលើកមកជូននូវពន្លឺ អររ៉ូរ៉ា (aurora) ឬដែលគេនិយមហៅថា ពន្លឺតំបន់ប៉ូល គឺជាពន្លឺធម្មជាតិមួយដែលបង្ហាញខ្លួននៅលើផ្ទៃមេឃ ក្នុងតំបន់ដែលមានរយៈទទឹងខ្ពស់ជាពិសេសនៅ តំបន់អាកទិច (ប៉ូលខាងជើង) និងអង់តាកទិច (ប៉ូលខាងត្បូង)។

នៅតំបន់ខាងជើង គេអាចមើលឃើញពន្លឺនេះ នៅឆ្នេរភាគខាងជើង តំបន់ស៊ីបេរី ស្កង់ឌីណាវៀ គ្រីនលែន ប្រទេសកាណាដា អ៊ីស្លង់ ជាដើម។

នៅតំបន់ខាងត្បូងវិញគេអាចមើលវាឃើញនៅតំបន់អង់តាកទិចផ្ទាល់ និងសមុទ្រភាគខាងត្បូង។ ជាទូទៅវាមានពណ៌បៃតង តែពេលខ្លះគេក៏អាចមើលឃើញ អររ៉ូរ៉ា ពណ៌ខៀវ និងក្រហមផងដែរ។

ពន្លឺអររ៉ូរ៉ានេះ មានទំនាក់ទំនងជាមួយនឹងជំនោររបស់ព្រះអាទិត្យដែលបក់កាត់ភពផែនដី។ ជំនោរទាំងនោះបក់ចេញពីព្រះអាទិត្យ និងផ្ទុកដោយសមាសធាតុ ប្លាស់ស្មា (Plasma) ល្អិតៗ ដែលត្រូវបានស្រូបទាញទៅក្នុងតំបន់ប៉ូលរបស់ភពផែនដីដោយកម្លាំងម៉ាញេទិច។

បន្ទាប់មកវាបង្កឱ្យមានការប៉ះទង្គិចគ្នារវាងសមាសធាតុល្អិតៗទាំងនោះដែលផ្ទុកដោយថាមពល និងបណ្ដុំអាតូមនីត្រូសែន និងអុកស៊ីសែននៅក្នុងបរិយាកាសផែនដី ដែលបង្កើតបានជាថាមពលថ្មីមួយក្នុងទម្រង់ជាពន្លឺអររ៉ូរ៉ា។

ចំណុចមិនគួររំលងមួយទៀតនោះគឺ អររ៉ូរ៉ាមិនមែនមានតែនៅលើភពផែនដីនោះទេ។ អ្នកវិទ្យាសាស្រ្ដបានរកឃើញពន្លឺអររ៉ូរ៉ា នៅលើភពមួយចំនួនទៀតក្នុងប្រព័ន្ធព្រះអាទិត្យដូចជា ភពព្រហស្បត៍ ភពសៅរ៍ ភពអ៊ុយរ៉ានុស ភពណិបទូន និងភពអង្គារ៍ជាដើម។

ហើយដូចទៅនឹងភពផែនដី ពន្លឺអររ៉ូរ៉ា នៅភពផ្សេងក៏ស្ថិតនៅក្បែរតំបន់ប៉ូលនៃភពទាំងនោះដែរ។អ្វីដែលគួរឱ្យចាប់អារម្មណ៍នោះគឺថា ពន្លឺអររ៉ូរ៉ានេះក៏អាចត្រូវបានគេមើលឃើញពីលំហអាកាសផងដែរ ដោយផ្កាយរណបរបស់អាវកាសយានិកធ្លាប់ចាប់បានរូបភាពដ៏ស្រស់ស្អាតរបស់វាពីលំហអាកាស៕

មតិយោបល់