សម្ដីទាំង ៩ ដែលអ្នកមិនគួរនិយាយទៅកាន់ឪពុកម្ដាយ
Connect with us

គ្រួសារ & ស្នេហា

សម្ដីទាំង ៩ ដែលអ្នកមិនគួរនិយាយទៅកាន់ឪពុកម្ដាយ

មនុស្សពីរនាក់ដែលសំខាន់ជាងគេបំផុតសម្រាប់មនុស្សសឹងតែគ្រប់គ្នាគឺជាលោកឪពុកនិងអ្នកម្ដាយ។ ពួកគាត់ជាអ្នកដែលមានគុណធំជាងគេគ្មានអ្វីអាចប្រៀបផ្ទឹមបាន ជាអ្នកដែលតស៊ូទ្រាំលំបាកនិងព្រមលះបង់អ្វីគ្រប់យ៉ាងដើម្បីសេចក្ដីសុខរបស់យើង ជាអ្នកដែលបានបីបាច់ចិញ្ចឹមយើងតាំងពីតូចរហូតដល់ធំប៉ុននេះ និងជាអ្នកដែលតែងនៅក្បែរនិងផ្ដល់កំលាំងចិត្តដល់យើងមិនថានៅក្នុងស្ថានភាពបែបណា។ ក្នុងនាមជាកូន តើយើងបានធ្វើអ្វីខ្លះ ជាការតបស្នងសងគុណដល់ពួកគាត់វិញ? ខណៈពេលកូនៗមួយចំនួនបានមើលថែរក្សាឪពុកម្ដាយរបស់ពួកគេយ៉ាងដិតដល់ មានមនុស្សមួយចំនួនទៀតបានត្រឹមធ្វើឲ្យឪពុកម្ដាយមានការព្រួយបារម្ភនិងពិបាកចិត្ត។ បើទោះបីជានៅពេលនេះ យើងមិនអាចធ្វើអ្វីច្រើនដើម្បីពួកគាត់​ ប៉ុន្ដែយ៉ាងហោចណាស់ យើងមិនគួរធ្វើឲ្យពួកគាត់ឈឺចាប់ដោយសារតែការប្រើពាក្យសម្ដីដូចខាងក្រោមឡើយ។

១. ចាំខ្ញុំធ្វើខ្លួនឯង!៖ ប្រាកដណាស់ អ្នកអាចធ្វើអ្វីមួយដោយខ្លួនឯងបាន តែជាជាងការនិយាយបែបនេះ អ្នកគួរប្រាប់ពួកគាត់ថា “ម៉ាក់ប៉ាកុំបារម្ភអី! កូនអាចធ្វើខ្លួនឯងបាន!”។

២. វាជាជីវិតរបស់ខ្ញុំ! ខ្ញុំចង់ធ្វើអ្វីជារឿងរបស់ខ្ញុំ!៖ នៅពេលដែលគាត់លឺបែបនេះ គាត់អាចអារម្មណ៍អាក់អន់ចិត្ត។ ដូច្នេះហើយ អ្នកគួរតែប្រាប់ពួកគាត់ថា អ្នកចង់ធ្វើការសម្រេចចិត្តដោយខ្លួនឯង។

៣. ប៉ាម៉ាក់មិនយល់នោះទេ!៖ ពួកគាត់មានវ័យចាស់ជាងយើង និងមានបទពិសោធន៍ជីវិតច្រើនជាងយើង ដូច្នេះអ្នកមិនគួរនិយាយបែបនេះនោះទេ។ ហើយបើទោះជាមានរឿងខ្លះគាត់ប្រហែលជាមិនយល់ ជាជាងការនិយាយដូច្នោះ អ្នកគួរតែប្រាប់ រឺពន្យល់គាត់ឲ្យបានយល់។

៤. ប៉ាម៉ាក់មិនដែលជឿទុកចិត្តខ្ញុំទេ!៖ បើទោះបីវាជាយ៉ាងណាក៏ដោយ អ្នកគួរជៀសវាងប្រើសម្ដីបែបនេះទៅកាន់ពួកគាត់។ ដោយឡែក អ្នកគួរខិតខំប្រឹងប្រែងបន្ដ ដើម្បីឲ្យពួកគាត់ឃើញពីសមត្ថភាពរបស់អ្នក ហើយអ្នកអាចជំនួសដោយការ​និយាយថា “កូនចង់ឲ្យប៉ាម៉ាក់មានមោទនភាពចំពោះកូន”។

៥. សម័យនឹងហើយ គ្មានពីណាស្លៀកពាក់ចឹងទៀតទេ!៖ ការតែងខ្លួនរបស់ពួកគាត់អាចនឹងមានភាពចាស់គំរិល ប៉ុន្ដែអ្នកដាច់ខាតមិនត្រូវនិយាយបែបនេះឡើយ។ អ្នកអាចបបួលគាត់ដើរផ្សារជាមួយគ្នា ហើយទិញសម្លៀកបំពាក់ដែលល្អស្អាតជូនពួកគាត់។

៦. ខ្ញុំធំហើយ! មិនចាំបាច់បារម្ភច្រើនពេកនោះទេ!៖ ឪពុកម្ដាយតែងតែចង់ឲ្យកូនមានសុខភាពល្អនិងមានសុវត្ថិភាពរាល់ពេលទៅណាមកណា ហើយការបារម្ភនេះក៏កើតចេញពីសេចក្ដីស្រលាញ់របស់ពួកគាត់ផងដែរ។ តើការបារម្ភទាំងនោះពិតជារំខានអ្នកខ្លាំងណាស់រឺ? តើគាត់ខុសមែនទេ ដែលគ្រាន់តែបារម្ភពីអ្នក? អ្នកប្រហែលជាធំដឹងក្ដីមែន តែអ្នកមិនគួរនិយាយបែបនោះឡើយ។​ អ្នកអាចប្រាប់ពួកគាត់តាមសម្រួលថា អ្នកបានរៀនពីជីវិតច្រើនណាស់ ហើយពួកគាត់អាចទុកចិត្តលើអ្នកបាន។

៧. ខ្ញុំរវល់ណាស់ គ្មានពេលនិយាយច្រើនទេ!៖ អ្នកអាចមានភាពមមាញឹកនឹងការងារ ប៉ុន្ដែអ្នកផ្ដោតអារម្មណ៍នៅលើការងារតែម្យ៉ាង ហើយគ្មានពេលសូម្បីតែពីរបីនាទីសម្រាប់គ្រួសារនោះឡើយ។ មិនថារវល់ខ្លាំងប៉ុនណា អ្នកមិនត្រូវប្រើសម្ដីបែបនេះឡើយ។ អ្នកអាចប្រាប់ពួកគាត់ថា អ្នកនឹងតេទៅបន្ដិចទៀតនេះ បន្ទាប់ពីទំនេរដៃ។

៨. ឥឡូវវាមិនដូចកាលពីមុនទៀតទេ!៖ ការប្រែប្រួលដោយសារតែពេលវេលាជារឿងពិត ប៉ុន្ដែការនិយាយត្រង់ៗបែបនោះអាចនឹងធ្វើឲ្យពួកគាត់មានអារម្មណ៍មិនល្អ។ ដូចនេះហើយ អ្នកអាចនិយាយទៅកាន់ពួកគាត់ថា “ប៉ាម៉ាក់ពិតជានិយាយត្រូវណាស់ ប៉ុន្ដែឥឡូវវាមានការផ្លាស់ប្ដូរហើយ”។

៩. ពួកខ្ញុំមិនអាចទៅលេងប៉ាម៉ាក់បានទេ!៖ ជីវិតគ្រួសារផ្ទាល់ខ្លួននិងការងារអាចនឹងធ្វើឲ្យអ្នកមានការរវល់ខ្លាំង​ តែអ្នកមិនគួរប្រាប់ពួកគាត់បែបនេះឡើយ។ ជាជាងការនិយាយថាអ្នកនឹងមិនអាចទៅលេងពួកគាត់បាន អ្នកអាចសួរគាត់ថា “តើប៉ាម៉ាក់នឹងមកលេងកូននៅចុងសប្ដារហ៍នេះទេ? ចៅៗនឹកលោកយាយលោកតាណាស់”៕

ប្រភព៖ Bright Side

អត្ថបទល្អផ្សេងទៀត៖ សម្ដី ៣ ឃ្លាអ្នកជាឪពុកម្ដាយមិនគួរនិយាយទៅកាន់កូនស្រីដាច់ខាត! ពុំនោះនាងអាចនឹងខូចអនាគត!

ការចិញ្ចឹមកូនមិនមែនជារឿងងាយនោះទេ ដោយអ្នកជាឪពុកម្ដាយត្រូវទំនុកបម្រុងទាំងផ្នែកលុយកាក់ ការផ្ដល់ភាពកក់ក្ដៅផ្នែករាងកាយ និងបញ្ញាស្មារតី ព្រមទាំងការប្រៀនប្រដៅអប់រំឱ្យកូនដើរតាមគន្លងផ្លូវត្រូវជាដើម។ 

ម្យ៉ាងទៀតបើសិនជាអ្នកមានកូនស្រី នោះអ្នកនឹងត្រូវមានការប្រុងប្រយ័ត្នមួយជាន់ទៀត ក្នុងការចិញ្ចឹមបីបាច់ពួកគេឱ្យក្លាយជាស្ដ្រីជោគជ័យមួយរូបនៅអនាគត។

ខាងក្រោមជាពាក្យសម្ដីទាំង ៥ ដែលអ្នកជាឪពុកម្ដាយមិនគួរនិយាយទៅកាន់កូនស្រីឡើយ៖

១. “កូនឯងត្រូវតែក្លាយជាមនុស្សឆ្លាតជាងគេ”៖

ការនិយាយបែបនេះទៅកាន់កូនស្រី វាមិនសូវមានផលប្រយោជន៍អ្វីក្រៅតែពីដាក់សម្ពាធលើនាងនោះទេ។ នៅពេលនាងធ្វើអ្វីមិនល្អនោះនាងនឹងគិតថានាងជាមនុស្សគ្មានប្រយោជន៍និងមិនគប្បីនឹងឪពុកម្ដាយ។ តែជំនួសវិញគួរលើកទឹកចិត្តនាងឱ្យប្រឹងប្រែងនិងហ៊ានប្រឈមនឹងកំហុស ព្រោះគ្មាននរណាចៀសកំហុសបាន ហើយក៏មិនអាចល្អឥតខ្ចោះរហូតដែរ។

២. “រៀនល្មមៗបានហើយប្រយ័ត្នគ្មានអ្នកហ៊ានចូលដណ្ដឹង”៖

ចាស់ៗជាច្រើននៅតែប្រកាន់យកផ្នត់គំនិតនេះ។ ពួកគាត់គិតថាកូនស្រីមិនចាំបាច់រៀនសូត្រច្រើនជ្រៅជ្រះខ្ពស់ខ្ពស់ពេកទេ។ គ្រាន់តែរៀនល្មមៗទៅវាគ្រប់គ្រាន់ហើយព្រោះពេលរៀបការគង់នឹងត្រូវប្ដីចិញ្ចឹមហើយត្រូវបំពេញការងារផ្ទះដដែល។

ម្យ៉ាងពួកគាត់ជឿថាបើកូនស្រីរៀនបានច្រើនខ្ពស់ពេក អាចនឹងគ្មានបុរសណាហ៊ានចូលដណ្ដឹងទេ។ តែតាមពិតសម័យនេះទៅហើយស្ដ្រីអាចរៀនខ្ពស់ដូចបុរសបានឱ្យតែពួកគេមានសមត្ថភាព។ ពួកគេនឹងមានទំនុកចិត្តកាន់តែខ្លាំងនិងមានភាពម្ចាស់ការនិងឯករាជ្យរឿងលុយកាក់ជាជាងពឹងលើស្វាមី ព្រោះស្នេហាវាអាចមិនឋិតឋេរ។

៣. “ចរិតក្មេងប្រុសគឺអ៊ីចឹងឯង”៖

ជាទូទៅឪពុកម្ដាយតែងនិយាយឃ្លានេះដើម្បីលួងលោមកូនស្រីនៅពេលដែលនាងត្រូវទទួលរងការគាបសង្កត់ ឬធ្វើបាបពីក្មេងប្រុសៗ។ តែឃ្លានេះពិតជាគ្រោះថ្នាក់ណាស់។ ពិតណាស់វាអាចសម្រាលលួងលោមកូនស្រីបានមួយគ្រាតែ នាងនឹងចាំជាប់ក្នុងចិត្តថា កើតមកជាស្រីគឺមិនអាចចៀសផុតពីការធ្វើបាបពីបុរស។

នាងនឹងចាត់ទុករាល់អំពើមិនល្អរបស់ក្មេងប្រុសជារឿងធម្មតា ដែលនាងមិនគួរនិងមិនហ៊ានតវ៉ាប្រឆាំង។ នាងនឹងបាត់បង់អស់ភាពក្លាហានប្រឈមនឹងមនុស្សប្រុស។

៤. “ហាត់ប្រាណទៅកុំឱ្យធាត់ពេក ប្រយ័ត្នគ្មានអ្នកស្រឡាញ់”៖

ការណែនាំកូនឱ្យហាត់ប្រាណវាជារឿងល្អ។ តែកុំបង្ខំនាងឱ្យហាត់ប្រាណដោយបន្លាចថា នាងនឹងធាត់ហើយគ្មានអ្នកស្រឡាញ់។ វាអាចនឹងធ្វើឱ្យនាងបាត់បង់ទំនុកចិត្តលើសម្រស់ខ្លួនឯង។ នាងក៏អាចយល់ខុសថាការហាត់ប្រាណគ្រាន់តែដើម្បីសម្រស់ដើម្បីបំពេញភ្នែកអ្នកដទៃ ដែលអាចឱ្យនាងគ្មានកម្លាំងចិត្តធ្វើវា។ 

តែគួរពន្យល់នាងថាការហាត់ប្រាណ គឺដើម្បីសុខភាពផ្ទាល់ខ្លួន និងដើម្បីភាពស្រស់ស្រាយ រឹងប៉ឹងទាំងផ្លូវកាយនិងផ្លូវចិត្ត៕

មតិយោបល់

ពេញនិយម